Opnað hefur verið fyrir umsóknir í Æskulýðssjóð USVS. Aðildarfélög geta sent inn umsóknir og þurfa þær að berast fyrir 1. mars næstkomandi.
Nánar má lesa um reglur Æskulýðssjóðs hér:
-
Innanhúsmót USVS 14. febrúar
Frjálsíþróttamót USVS innanhús fer fram á Kirkjubæjarklaustri laugardaginn 14. febrúar næstkomandi. Mótið hefst kl. 10:00.
Skráningar sendist á usvs@usvs.is – sjá keppnisgreinar hér í meðfylgjandi auglýsingu.
-
Stjörnuleikar á Suðurlandi
Stjörnuleikar á Suðurlandi: Íþróttaskemmtun fyrir börn með sér- og stuðningsþarfir.
Íþróttahúsinu Vallaskóla á Selfossi
7. febrúar kl. 13:00-14:30Hægt verður að prófa ýmsar íþróttagreinar og leiki. Afreksíþróttafólk og Sóli lukkudýr Allir með mæta á svæðið.
-
Ráðning framkvæmdastjóra
Í dag undirritaði Jóhann Bragi Elínarson, formaður USVS, fyrir hönd stjórnar samning við Sigurð Eyjólf Sigurjónsson um ráðningu í starf framkvæmdastjóra USVS í 50% starf.
Sigurður, eða Siggi eins og hann er alltaf kallaður, hefur verið viðloðandi íþróttastarf innan USVS frá árinu 2017 og komið að fjölbreyttum verkefnum. Má þar m.a. nefna að hann starfaði við knattspyrnuþjálfun hjá Umf. Kötlu og síðar hjá Ungmennafélögunum Ármanni og Skafta sem sameinuðust í Umf. ÁS. Hann hefur verið í fararstjórn USVS á Smábæjaleikunum og á Unglingalandsmótum UMFÍ undanfarin ár. Nú síðast starfaði hann sem íþrótta- og æskulýðsfulltrúi í Skaftárhreppi.
“Það er með mikilli tilhlökkun og þakklæti sem ég tek við starfi framkvæmdastjóra. Ég mun svo sannarlega leggja mig allan fram við að efla USVS og veita aðildarfélögunum sem besta þjónustu. Ég hlakka mikið til þess starfs sem framundan er,” sagði Sigurður við undirskriftina.
USVS býður Sigurð velkominn til starfa og hlakkar til samstarfsins.
Hægt er að hafa samband við Sigurð í síma 691-9594 eða í tölvupósti á netfangið framkvaemdastjori@usvs.is. Sigurður er sem stendur búsettur á Akureyri þar sem hann er í námi en hann verður með reglulega viðveru á starfssvæði sambandsins.
-
Smábæjarleikarnir á Blönduósi 2025
Leið Vestur-Skaftfellinga lá að venju á Blönduós á Smábæjarleikana síðustu helgi, þann 14- 15. júní sl, og skemmtu sér konunglega.
Árangurinn var heldur ekki af verri gerðinni en 5. flokkur tryggði sér silfrið eftir mjög harða baráttu í undanúrslitum á sunnudeginum. Léku þau 6 leiki á laugardag, og unnu þrjá af þeim og gerðu eitt jafntefli. Á sunnudeginum var hart barist, þau komust í úrslit og þurftu að bíða ósigur með einu marki. Glæsilegur árangur hjá okkar krökkum.
6. flokkur stóð sig einnig með prýði og höfnuðu í 7. sæti af 12 liðum.
Í ár var USVS með tvö lið í 7. flokk en aldrei hafa fleiri keppendur verið skráðir til leiks með USVS, og ekki áður verið tvö lið í sama aldursflokknum. Mörg barnanna í 7. flokk voru að keppa í fyrsta sinn á Smábæjarleikunum, en þau höfnuðu í 4. og 7. sæti á mótinu.Undirrituð vil fyrir hönd stjórn USVS þakka öllum foreldrum og forráðamönnum fyrir að taka þátt í þessu skemmtilega móti með krökkunum og Sigurði Eyjólfi Sigurjónssyni íþrótta – og æskulýðsfulltrúa Skaftárhrepps fyrir skipulag og utanumhald.
-
Íþróttamaður USVS 2021
Á 52. Sambandsþingi USVS var Sigríður Ingibjörg Einarsdóttir valin Íþróttamaður USVS 2021. Sigríður Ingibjörg hefur átt gott ár. Hún varð Íslandsmeistari í 100 m skeiði ungmenna og í 2. sæti í 150 m skeiði ungmenna með Hryssuna Ylfu frá Miðengi Sigríður Ingibjörg er fyrsti Sindrafélaginn til að verða Íslandsmeistari í sögu félagsins. Sigíður var tilnefnd sem efnilegasti knapi ársins hjá Landsambandi Hestamanna og var í 24 knapa úrtaki inn í Landsliðið en komst ekki inn að sinni.
Egill Atlason Waagfjörð frá Ungmennafélaginu Kötlu og Svanhildur Guðbrandsdóttir frá Hestamannafélaginu Kópi voru einnig tilnefnd sem íþróttamaður ársins 2021
-
Eyjólfur Lárus er efnilegasti íþróttamaður USVS 2021
Á Sambandsþingi USVS voru veitt verðlaun fyrir efnilegasta íþróttamanns USVS. Tveir drengir frá Ungmennafélaginu Kötlu voru tilnefndar, Bjarni Steinn Vigfússon og Eyjólfur Lárus Guðbjörnsson . Eyjólfur var valinn efnilegasti íþróttamaður ársins 2021.
Eyjólfur Lárus tók þátt í Meistaramótum Íslands 11-14 ára innan og utanhúss á árinu með mjög góðum árangri. Þar varð hann meðal annars í 2. sæti í kúluvarpi 14 ára pilta bæði á innan og utanhússmótinu og á hann annað lengsta kastið í kúluvarpi 2021 á Íslandi í hans aldursflokki. Hann bætt sig í flestum greinum sem hann tók þátt í á árinu og árangur hans er á topp 10 lista yfir landið í 6 greinum af þeim 9 sem hann keppti í á árinu. Þá setti hann 3 héraðsmet:
Utanhúss:
Kúluvarp, Mí 11-14 ára, 10,38m
Innanhúss:
600m hlaup, Mí 11-14 ára 1:48,22
Kúluvarp, Mí 11-14 ára, 9,56m
Eyjólfur Lárus er virkur og áhugasamur íþróttamaður og stundaði einnig knattspyrnu og körfuknattleik á árinu og mætir vel á æfingar, hann er jákvæður og góður liðsfélagi
-
Sigmar Helgason sæmdur Gullmerki UMFÍ
Sambandsþing USVS var haldið á Hótel Laka 29. mars 2022. Þingið tókst vel og mættu 27 þingfultrúar af 30. Góðir gestir, þau Ragnheiður Högnadóttir frá UMFÍ og Andri Stefánsson frá ÍSÍ, komu á þingið og ávörpuðu fundarmenn.
Ragnheiður heiðraðir nokkra sjálfboðaliða USVS. Starfsmerki UMFÍ fengu Kristín Lárusdóttir, Fanney Ólöf Lárusdóttir og Eva Dögg Þorsteinsdóttir. Þessar konur eru vel af starfsmerkinu komnar enda hafa þær allar verið leiðandi íþróttastarfi í Vestur-Skaftafellssýslu síðustu ár. Gullmerki UMFÍ fékk Sigmar Helgason fyrir óþrjótandi áhuga og vinnu fyrir íþróttastarfi.
Engar breytingar urðu á stjórn sambandsins. Formaður USVS er áfram Fanney Ásgeirsdóttir aðrir í stjórn eru: Sif Hauksdóttir, Sigmar Helgason, Árni Jóhannsson og Ragnar S. Þorsteinsson. Stjórn mun svo skipta með sér verkum á fyrsta stjórnarfundi. Varastjórn skipa þær Fanney Ólöf Lárusdóttir, Sabina Victoria Reinholdsdóttir og Kristín Ásgeirsdóttir.
Við göngum inn í nýtt starfsár, bjartsýn á framtíðina og fullviss um að framundan sé skemmtilegt sumar, fullt af íþróttamótum, samverustundum og alls konar sameiginlegri gleði.
